A formación proporcionada por este título permite completar a formación inicial de mestres/as, psicólogos/as, pedagogos/as, psicopedagogos/as, educadores/as sociais, traballadores sociais e outros/as profesionais do ámbito educativo e socioeducativo, interesados na investigación psicosocioeducativa.
Este Programa de Doutoramento permite especializar a estes profesionais para exercer de forma máis sistemática o seu labor nos distintos ámbitos do sistema educativo e socioeducativo:
- Centros escolares de infantil, primaria e secundaria
- Equipos e servizos especializados de orientación educativa e psicopedagóxica
- Departamentos de orientación, equipos de orientación provinciais, centros de detección e tratamento das dificultades de aprendizaxe
- Area educativa e social de concellos, deputacións, entidades de educación social en todos os ámbitos de intervención
- Servizos sociais
- Centros de formación e recursos
- Centros públicos e privados de I+D+i
- Asesoramento a ANPAS e a outras asociacións específicas
Por outra banda, supón unha axuda especializada para aquelas persoas con necesidades especiais no campo da aprendizaxe, da autonomía persoal e social, e no apoio para a participación na comunidade, o lecer, etc.
En definitiva, este Programa de Doutoramento mantén o seu interese para profesionais e investigadores do ámbito educativo, social e do comportamento. A especificidade deste Programa de Doutoramento, fronte a outros que poidan ofertarse no ámbito da Educación, radica en contemplar de maneira interdisciplinar aspectos pedagóxicos, psicolóxicos e sociais, pensando nos perfís formativos previos de estudantado que cursa os graos de Educación Infantil, Educación Primaria, Educación Social ou Traballo Social no campus de Ourense.
Outros/as titulados/as que se interesan polo programa teñen formación similar e intereses comúns, o que enriquece o perfil de ingreso, ampliando as nosas expectativas iniciais. Os/as titulados/as doutros campus e universidades, particularmente de Portugal, melloran o perfil de ingreso previsto.